ESPO: MARGARITA SALAS, una muyer con ciencia

Esta esposición, llega al Colexu Públicu Montevil, al traviés de la Oficina de Normalización Llingüística de Xixón, pensada pa públicu n’edá escolar, quier sacar a la lluz l’importante papel de les muyeres na investigación científica, centrándose sobre manera na interesante trayeutoria de l’asturiana Margarita Salas, analizando los sos descubrimientos y percorriendo toles sos etapes vitales.

La bata blanca, el pelo curtio, la sonrisa dispuesta. Margarita mira con modestia; asina lo confirmen los sos retratos na prensa. Alredor d’ella les pipetes, el matraz, les plaques, les muestres y los papeles del llaboratoriu que semeyen notes pa nun escaecer nada de nada. Cualquiera que nun fora ella pensaría que nesi espaciu ta descifrándose un gran secretu.

Daqué de too eso hai na ciencia, mucha maxa nos fechos, nos datos. Y tamién munchu trabayu, trabayu n’equipu y una investigación básica d’escelencia qu’esta asturiana nacida en Caneiru (Valdés) en 1938 defendía convencida.

¿Foi Margarita Salas Falgueras dalguna vez una neña pequeña? Cuesta imaxinar a una de les meyores científiques españoles del sieglu XX estudiando en Xixón tovía piquiñina, pensando nel so destín ensin poder albidrar les importantes aportaciones a la historia de la ciencia que diben suponer los sos descubrimientos. En 1963 doctoróse en Bioquímica pola Universidá Complutense de Madrid. En 1964 mudóse a Nueva York pa investigar xunto al nobel Severo Ochoa, del que primero fora pupila. En 1967 regresó a España y fundó’l primer grupu d’investigación en xenética molecular del país nel Conseyu Superior d’Investigaciones Científiques (CSIC).

La bata blanca, les manes llargues y l’azul infinito de la mar sele nesos güeyos que tantes veces se posaron nun microscopiu. Ella foi la responsable xunto a Eladio Viñuela, el so maríu y padre de la so fía Lucía, del desarrollu de la bioloxía molecular n’España. El so mayor llogru foi descubrir l’ADN polimerasa del virus bacteriófagu phi29, una tecnoloxía que permite amplificar l’ADN de manera rápida y cenciella y que s’emplega na medicina forense, l’arqueoloxía o la investigación del cáncer. Ye, por cierto, la patente más rentable del CSIC.

Profesora de Xenética Molecular na Facultá de Químiques de la Universidá Complutense de Madrid, foi tamién presidenta de la Sociedá Española de Bioquímica, directora del Centru de Bioloxía Molecular Severo Ochoa, la siella i de la Real Academia Española, doctora honoris causa por diez universidades y la primera muyer española n’ingresar na Academia Nacional de Ciencies d’EE. XX.

Y sobre manera, foi una de les poques científiques españoles conocida pol so nome propiu. Un nome que tres del so fallecimientu en 2019, con ochenta años, Xixón dio-y a la so Milla del Conocimientu. Un nome que yá ye un referente pa tantes muyeres que nun quieren ver la ciencia como un misteriu, sinon como una posibilidá profesional.